Chi credeu che sia el Papa? El xe un buffon,
un matto, che ga in testa tre corone,
uno, che maledisse le persone
co no le crede in te la so opinion,
un, che porta do chiave a piccolon,
e va disendo che le so chiavone
del santo Paradiso le xe bone
de verzer, e serrar el gran porton.
Ma, se la stasse qua, pacienza ancora;
el mal xe che el ga stati, el ga sbiraggia,
cosse che mai San Piero ha cattà fora;
el ga po in corte tanta gran canaggia,
che crede nome in te la magnaora,
e lassa che i cogioni se travaggia.
Giorgio Baffo, patrizio veneto, 1694-1768
